أريد الإلتحاق بقسم علوم الحاسب (إستفسار)

السلام عليكم ورحمة الله وبركاته
بسم الله الرحمن الرحيم

انا احمد عبد الرازق وخريج كلية حقوق جامعة القاهرة بتقدير مقبول 59% ولكني أعمل مبرمج كمبيوتر بلغة الجافا بعد أخذ كورسات عملي بالظبط Web developer (JSP & Servlet) وهل ينفع ادخل معهد الإحصاء قسم علوم الحاسب بعد اجتياز الإمتحانات المطلوبة الخاصة بقسم علوم الحاسب؟

وشكرا

السلام عليكم ورحمه الله
أولا لائحة المعهد بتشترط للتقدم لدبلوم علوم الحاسب ان يكون المتقدم من حمله المؤهلات العليا
وتانى شئ إجتياز الإختبارات الخاصة بالمعهد وهى عبارة عن إختبار فى الرياضيات (الجبر)
وإختبار فى البرمجة (بلغة ++C)
لو نجحت فى الاختبارات ديه تقبل ان شاء الله فى المعهد بصرف النظر عن كليتك ايه طالما مؤهل عالى
وديه بصراحة اجمل ميزه فى المعهد
والتقديم بيكون كل سنة من بداية الصيف لغاية منتصف أغسطس اللى بيتم فيه الاختبارت
يعنى التقديم السنة ديه خلاص كل سنة وانت طيب لو ملحقتوش قدم السنة الجاية ان شاء الله

شكرا يا أستاذ محمود
كدة يبقى حلو اوي
بس ممكن أعرف ايه هي الحاجات اللي هيمتحنونا فيها في الرياضيات وال C++ يعني مواضيع الإمتحان يعني مثلا في ال C++ هيكون فيه OOP ولا لأ وكدة يعني المواضيع اللي ممكن تيجي في الإمتحان عشان أذاكر فيها

وجزاك الله خيرا

العفو يا أستاذ أحمد
ولعى فكرة أنا كمان خريج كلية الحقوق بس جامعة عين شمس
ودرست البرمجة قرصات قبل كدة وقدمت وقبلت الحمد لله فى قسم علوم الحاسب السنة الحالية
بص يا سيدى
أول شئ امتحان الرياضيات وده امتحان سهل جدا خصوصا لو كنت درست الرياضة فى الثانوية العامة
لو كنت علمى يعنى
والمقرر بتاع الاختبار عبارة عن (حل المعادلات من الدرجة الأولى ,النهايات والاتصال فى الدوال, التفاضل والتكامل ,المتوالية الحسابية والمتوالية الهندسية والممصفوفات والمحددات ,اللوغاريتمات والدالة وقوانين الأسس)
أما البرمجة فالامتحان بيبقي فى مقدمة فى اللغة بدائيات يعنى مفيهوش او او بى خالص
والمطلوب فى الاختبار هو (presedence of operators, basic input&output phrases, conditions encluding if ,ifelse, switch, loops including for, while and do while)
وعلى كل حال المعهد بيعمل دورة تدريبية فى الرياضة والبرمجة قبل معاد الاختبار للى عايز يشترك
السنة دية مثلا كان فى دورة فى الرياضة ثمنها 150 جنية اخدنا فيها الحاجات اللى هتمتحن فيها فى الاختبار
وكان فى دورة برمجة برضو ثمنها 250 جنية بس ديه انا محضرتهاش بقى لانى عندى خلفية عن البرمجة سابقا
على كل حال تابع التقديم فى المعهد من السنة الجاية ان شاء الله من اول شهر يوليو وان شاء الله اشوفك معانا السنة الجاية